تجھے عشق ہو خدا کرے
کوئی تجھ کو اس سے جدا کرے
تیرے ہونٹ ہنسنا بھول جائیں
تیری آنکھ پُر نم رہا کرے
تو اُس کی باتیں کیا کرے
تو اُس کی باتیں سنا کرے
اُسے دیکھ کے تو رُک پڑے
وہ نظر جھکا کے چلا کرے
تجھے ہجر کی ایسی چھڑی لگے
تو ملن کی ہر پل دُعا کرے
تیرے خواب بکھریں ٹوٹ کر
تو کرچی کرچی چنا کرے
تو نگر نگر پھرا کرے
تو گلی گلی صدا کرے
تیرے سامنے تیرا گھر جلے
تیرا بس چلے نہ بجھا سکے
تیرے دل سے یہی دُعا نکلے
نہ گھر کسی کا جلا کرے
تجھے عشق ہو پھر یقین ہو
اُسے تسبیحوں پہ پڑھا کرے
میں کہوں کہ عشق ڈھونگ ہے
تو نہیں نہیں کیا کرے
تجھے عشق ہو خدا کرے
کوئی تجھ کو اس سے جُدا کرے